O Concello de Valdoviño abriu o proceso selectivo para a contratación temporal de 32 socorristas e unha persoa coordinadora que prestarán servizo nas praias do municipio durante a tempada estival de 2026.

Características dos contratos

A campaña de salvamento e socorrismo desenvolverase entre o 1 de xullo e o 31 de agosto de 2026, cunha duración inicial de 62 días naturais, sen prexuízo de posibles ampliacións por necesidades do servizo.

Retribucións:

• Socorrista: 1.600 euros brutos mensuais.
• Coordinador/a: 1.800 euros brutos mensuais.

Requisitos

As persoas aspirantes deberán:

• Ter cumpridos os 16 anos.
• Estar inscritas no Rexistro Profesional de Socorristas Acuáticos de Galicia na sección de espazos acuáticos naturais ou acreditar que están en trámite de inscrición.
• Presentar certificado médico oficial que acredite as condicións físicas necesarias para desempeñar o posto.
• Acreditar o coñecemento da lingua galega mediante o CELGA 3 ou equivalente, ou realizar a proba correspondente.

No caso da praza de coordinación tamén será necesario:

• Dispoñer do permiso de conducir B.
• Acreditar experiencia previa en servizos de socorrismo en espazos acuáticos naturais.

Sistema de selección

O proceso realizarase mediante concurso-oposición.

Fase de oposición

• Proba física consistente nun rescate de maniquí con aletas en piscina.
• Proba de galego para quen non acredite o CELGA 3.

Fase de concurso
Valoraranse:

• Experiencia profesional en socorrismo acuático.
• Formación complementaria relacionada co posto.
• Titulacións como DESA/DEA actualizado ou PER.

Selección da persoa coordinadora

A persoa coordinadora será elixida entre os aspirantes que superen o proceso selectivo para socorrista e cumpran os requisitos específicos.

A selección realizarase mediante unha entrevista profesional na que se valorarán aspectos como:

• Capacidade de liderado.
• Coordinación de equipos.
• Xestión de conflitos.
• Toma de decisións.
• Actuación en situacións de emerxencia.

Prazo de solicitude

As solicitudes poderán presentarse durante un prazo de cinco días hábiles desde a publicación da convocatoria no Boletín Oficial da Provincia da Coruña.