A Deputación Provincial de Ourense publicou a convocatoria para a renovación e formación, mediante concurso de méritos, das listas de contratación de persoal laboral temporal na categoría de chófer/a especialista (subgrupo C2).

A convocatoria permitirá incorporar novas persoas aspirantes ás listas e actualizar os méritos das que xa forman parte delas. Ademais, revisarase de oficio a situación das persoas integrantes para actualizar a súa posición segundo a experiencia profesional acreditada.

As listas manterán a súa estrutura habitual:

• Lista principal para persoas con permiso de conducir C+E.
• Lista supletoria para persoas con permiso C, destinada aos postos que non requiran o permiso C+E.

As persoas interesadas deberán contar, entre outros requisitos, co título de ESO ou equivalente, o permiso de conducir correspondente, o certificado de aptitude profesional (CAP) e acreditar o coñecemento da lingua galega mediante o Celga 3 ou a superación da proba lingüística prevista.

O prazo de presentación de solicitudes será dun mes contado desde o día seguinte á publicación da convocatoria no Boletín Oficial da Provincia (BOP). As solicitudes poderán presentarse de forma presencial ou telemática a través da sede electrónica da Deputación.

A participación no proceso require o pagamento dunha taxa de 13 euros, coa posibilidade de exencións ou bonificacións para persoas con discapacidade, desempregadas de longa duración e familias numerosas.

A selección realizarase mediante concurso de méritos, valorando principalmente a experiencia profesional e a formación relacionada co posto. As listas resultantes terán unha vixencia de dous anos e servirán para cubrir as necesidades temporais de persoal da Deputación Provincial de Ourense.