A Deputación de Pontevedra vén de lanzar unha nova convocatoria do programa “+Xuntas” 2026, unha iniciativa dirixida a promover a igualdade efectiva entre mulleres e homes a través da formación, o apoderamento persoal e a creación de redes de apoio na provincia.

O programa, que se consolida como unha ferramenta clave en materia de igualdade, está orientado a mellorar a formación básica das mulleres, favorecer a súa autonomía e impulsar a participación activa, a sororidade e a cohesión social, prestando especial atención ao ámbito rural e á loita contra o illamento social.

“+Xuntas” tamén ten como obxectivo sensibilizar á cidadanía en igualdade de xénero, contribuíndo á ruptura de estereotipos e roles tradicionais e actuando como medida preventiva fronte á violencia machista. Todas as accións formativas incluirán de maneira transversal contidos en igualdade e un módulo obrigatorio de sensibilización de cinco horas.

A quen vai dirixido

A convocatoria está dirixida a asociacións, federacións e fundacións sen ánimo de lucro da provincia de Pontevedra, ou con delegación nela, que teñan entre os seus fins a promoción das mulleres e a igualdade de oportunidades. As entidades interesadas poderán escoller unha única acción formativa do catálogo ofertado, sempre que dispoñan das instalacións e medios necesarios.

As accións formativas estarán abertas a toda a poboación, aínda que as mulleres terán preferencia, permitindo a participación de homes ata un máximo do 25 % das prazas dispoñibles.

Formación e prazos

Os obradoiros terán unha duración de 35 horas, desenvolveranse ao longo do ano 2026 e contarán cun máximo de entre 20 e 25 prazas, segundo a especialidade. Para a súa realización será necesario un mínimo de 12 persoas participantes.

O procedemento de concesión será de concorrencia non competitiva, por orde de entrada das solicitudes, con prioridade para as entidades de mulleres.

As solicitudes deberán presentarse exclusivamente por vía electrónica a través da Sede electrónica da Deputación de Pontevedra. O prazo de presentación será dun mes a partir do día seguinte á publicación da convocatoria no Boletín Oficial da Provincia.

Con esta nova edición de “+Xuntas”, a Deputación de Pontevedra reafirma o seu compromiso cunha sociedade máis xusta, inclusiva e igualitaria, apoiando políticas públicas que responden ás necesidades reais das mulleres e fomentan a transformación social desde o ámbito local.