• O director da Fundación Galicia Europa e a directora xeral de Xuventude participaron hoxe en Santiago no evento de comunicación do proxecto RuralYouthFuture, centrado na mellora do instrumento financeiro e na difusión de iniciativas que impulsan o emprego xuvenil e o desenvolvemento do rural en Galicia.  Esta iniciativa Interreg Europe, busca reter o talento novo e reducir a fenda entre o mundo rural e o urbano

O proxecto europeo RuralYouthFuture presentou o evento de comunicación cun encontro en Santiago de Compostela centrado en fortalecer as oportunidades laborais para a mocidade no rural galego. O acto contou coa participación de Jesús Gamallo, director da Fundación Galicia Europa (FGE), e Lara Meneses, directora xeral de Xuventude.

Durante a sesión, presentáronse as optimizacións nos instrumentos financeiros do proxecto, deseñadas para facer máis eficaz o investimento en políticas de emprego. O encontro serviu de escaparate para diversas iniciativas de éxito que xa están a transformar o territorio:

• Dixitalización e Emprego: Destacaron os proxectos DYAS (Digital Youth Ambassadors for SMEs) da Eurocidade Chaves-Verín e as escolas inclusivas de Acción contra el Hambre.

• Impacto Territorial e Emprendemento: A Cámara de Comercio de Compostela expuxo os proxectos MEO e Beautiful Bees, mentres que a Universidade de Vigo presentou as iniciativas Storcito e Silver Hub Rural.

• Liderado Xuvenil: A Dirección Xeral de Xuventude presentou Galicia Moza con Alma e o programa Fórmate na Empresa, contando co testemuño da ETL Don Bosco sobre o impacto real da primeira edición desta convocatoria.

O proxecto, que se estenderá ata febreiro de 2027, está liderado pola Fundación Galicia Europa e conta coa participación activa da Dirección Xeral de Xuventude xunto a socios de Bulgaria, Eslovenia, Letonia, Estonia, Portugal e Bélxica.

A estratexia de RuralYouthFuture céntrase en dotar aos equipos políticos de mellores ferramentas para evitar a "fuga de cerebros". Ao promover habilidades dixitais e novas formas de traballo, o proxecto non só busca reducir o desemprego, senón converter as zonas rurais en espazos atractivos e competitivos para vivir e traballar.