O Concello de Laxe convoca un proceso selectivo para a contratación temporal de cinco peóns/as destinados á limpeza das praias marítimas do municipio durante a campaña estival de 2026.

Esta iniciativa está subvencionada pola Deputación da Coruña a través do Programa de Limpeza de Praias Marítimas (MA100) e ten como obxectivo reforzar os traballos de conservación e mantemento dos areais e das zonas peripraia durante os meses de maior afluencia de visitantes.

Postos ofertados

• 5 peóns/peoas para a limpeza de praias marítimas.

Características dos contratos

• Contrato laboral temporal por circunstancias da produción.
• Duración: 2 meses e medio.
• Xornada completa.
• Horario adaptable ás necesidades do servizo, podendo incluír quendas de mañá e tarde, de luns a domingo.

Funcións principais

• Limpeza manual das praias.
• Retirada e clasificación de residuos.
• Limpeza das zonas peripraia.
• Mantemento e limpeza de mobiliario público como duchas, aseos e outros elementos de uso público.

Retribución

• Salario bruto mensual: 1.424,50 euros, incluída a parte proporcional das pagas extraordinarias.

Requisitos

• Ter cumpridos 16 anos.
• Posuír a capacidade funcional necesaria para o desempeño das tarefas.
• Non estar inhabilitado para o acceso ao emprego público.
• Cumprir os requisitos establecidos nas bases da convocatoria.
• Acreditar o coñecemento do galego mediante Celga 1 ou equivalente, ou superar a proba correspondente.

Proceso de selección
O sistema será de concurso-oposición.

A fase de oposición consistirá nun exame oral de 10 preguntas sobre:

• Coñecemento do concello de Laxe.
• Limpeza de praias e xestión de residuos.
• Uso de materiais e ferramentas de traballo.
• Mantemento e limpeza de mobiliario público.

As persoas aspirantes deberán obter un mínimo de 5 puntos sobre 10 para superar esta fase.

A fase de concurso valorará:

• Formación relacionada co posto.
• Experiencia profesional en tarefas similares tanto na empresa privada como na administración pública.

Presentación de solicitudes
O prazo para presentar solicitudes será de cinco días hábiles contados desde o día seguinte á publicación da convocatoria no Boletín Oficial da Provincia da Coruña.

As solicitudes poderán presentarse preferentemente a través da sede electrónica do Concello de Laxe ou polos medios habilitados na normativa administrativa vixente.

As persoas que superen o proceso e non obteñan praza pasarán a formar parte dunha bolsa de traballo para posibles substitucións durante a vixencia da campaña.