O Concello de Sober vén de aprobar as bases reguladoras e a convocatoria pública de subvencións dirixidas a asociacións culturais e entidades sen ánimo de lucro para o desenvolvemento de actividades culturais ao longo do ano 2025.

A resolución da Alcaldía, datada o 17 de setembro de 2025, establece que as axudas se concederán en réxime de concorrencia competitiva, cun crédito total dispoñible de 2.000 euros, cunha achega máxima de 300 euros por beneficiario.

Poderán optar ás axudas aquelas entidades que carezan de fins de lucro, desenvolvan as súas actividades no termo municipal de Sober e estean inscritas no Rexistro Municipal de Asociacións, entre outros requisitos.

As actividades subvencionables inclúen homenaxes, exposicións, publicacións, concursos, certames, mostras, excursións culturais, eventos musicais, encontros, conferencias ou estudos, sempre que teñan como finalidade a conservación, promoción e divulgación dos valores culturais do municipio.

📅 Prazo de solicitude: ata o 15 de outubro de 2025.
📍 Lugar de presentación: Departamento de Cultura do Concello de Sober (de luns a venres, de 9:00 a 14:00 h) ou a través da sede electrónica concellodesober.sedelectronica.gal.

O pagamento das subvencións realizarase mediante transferencia bancaria, unha vez xustificados os gastos correspondentes, cun prazo máximo de xustificación fixado no 15 de novembro de 2025.

Toda a información completa sobre a convocatoria pode consultarse no Boletín Oficial da Provincia de Lugo (BOP, núm. 221, do 25 de setembro de 2025) e na Base de Datos Nacional de Subvencións.