O Concello de Ferrol, a través da súa Concellería de Cultura, publica a convocatoria do programa de subvencións para a promoción e fomento da cultura desde as asociacións culturais e entidades sen ánimo de lucro do termo municipal, en réxime de concorrencia competitiva, correspondente ao exercicio 2025 (BDNS Identif.: 857848).

As bases reguladoras foron aprobadas pola Xunta de Goberno Local o 15 de setembro de 2025 e publicadas no BOP da Coruña nº 180, do 22 de setembro de 2025, ademais de estar dispoñibles no taboleiro de anuncios da sede electrónica do Concello.
🔗 Consulta do BOP
🔗 Texto completo na BDNS

Obxecto da convocatoria
Estas axudas teñen como finalidade apoiar economicamente proxectos culturais promovidos por asociacións culturais de Ferrol, garantindo principios de publicidade, transparencia, concorrencia, obxectividade e non discriminación.

Orzamento e contía
O crédito total dispoñible ascende a 48.000 €, con cargo á aplicación orzamentaria municipal 05101-3341-48000.
Cada entidade poderá recibir ata un máximo de 6.000 €, cun límite do 80 % do orzamento presentado para cada actividade.

Requisitos principais
As entidades deberán:

• Ter sede social en Ferrol.

• Estar ao corrente das obrigas tributarias e coa Seguridade Social.

• Fomentar a cultura no ámbito municipal.

• Empregar a lingua galega nas actividades e materiais de difusión.

• Cumprir cos criterios de igualdade e non discriminación establecidos nas bases.

Prazo de solicitude
O prazo será de 15 días hábiles contados desde o día seguinte á publicación do extracto no BOP da Coruña.
As solicitudes presentaranse exclusivamente a través da sede electrónica do Concello de Ferrol no modelo normalizado que figura como anexo nas bases.