O Concello de Porto do Son aprobou, mediante acordo da Xunta de Goberno Local do 15 de outubro de 2025, a convocatoria para a concesión de bolsas a deportistas individuais do municipio. O obxectivo desta iniciativa é apoiar e fomentar a práctica e o rendemento deportivo das persoas deportistas sonenses que destacasen pola súa traxectoria competitiva ao longo do último ano.

A convocatoria, publicada no Boletín Oficial da Provincia da Coruña do 23 de outubro de 2025 (BOP nº 203), pode consultarse tamén na Base de Datos Nacional de Subvencións (BDNS 863167) e na web municipal https://portodoson.gal.

Liñas de axuda

Establécense tres modalidades de bolsas:

• Beca A: para deportistas de disciplinas olímpicas ou paralímpicas que formen parte de seleccións nacionais absolutas, con opción de clasificarse para os próximos Xogos Olímpicos. Dotación: 2.500 €, a repartir entre as tres mellores puntuacións.

• Beca B: para outros/as deportistas que destacasen en competicións oficiais durante o ano de referencia. Dotación máxima: 1.000 €, a repartir entre as tres mellores puntuacións.

• Beca C: destinada a deportistas das categorías infantil e cadete. Dotación máxima: 1.500 €, a repartir entre as tres mellores puntuacións.

As persoas solicitantes deberán optar por unha única modalidade, xa que son incompatibles entre si.

Requisitos principais

Poderán solicitar estas bolsas as persoas que:

• Estean empadroadas en Porto do Son con, polo menos, tres anos de antigüidade.

• Conten cunha licenza federativa vixente.

• Estean ao corrente das súas obrigas fiscais e coa Seguridade Social.

• Practiquen un deporte olímpico ou paralímpico, podendo tamén considerarse outros deportes de especial relevancia competitiva.

Presentación de solicitudes

O prazo de presentación é de 10 días hábiles contados a partir do día seguinte á publicación da convocatoria no BOP.
As solicitudes deberán presentarse a través do Rexistro Xeral do Concello de Porto do Son ou da Sede Electrónica municipal, empregando o formulario normalizado dispoñible como Anexo I da convocatoria.

A resolución e demais información estarán dispoñibles na web municipal e no taboleiro da sede electrónica.

📍 Máis información:
https://portodoson.gal
Base de Datos Nacional de Subvencións – BDNS 863167