O Concello de Sada vén de publicar no BOP da Coruña a convocatoria das “Axudas económicas aos desprazamentos co fin escolar para o curso 2025”, destinadas a apoiar ao alumnado empadroado no municipio que debe desprazarse fóra do termo municipal para cursar estudos non obrigatorios.

A convocatoria foi aprobada mediante o Decreto da Alcaldía 2087/2025, do 10 de novembro, e rexerase polas bases reguladoras incluídas no propio documento.

📌 Obxectivo da convocatoria

As subvencións teñen como finalidade favorecer o acceso, a continuidade e a igualdade de oportunidades do alumnado sadense que cursa:

• Bacharelato

• Ciclos formativos de Formación Profesional

• Estudos universitarios

• Ensinanzas artísticas superiores

• Outras ensinanzas oficiais non obrigatorias

O programa dispón dun orzamento total de 9.000 euros, que se distribuirán entre as persoas solicitantes segundo os criterios de baremación establecidos.

📌 Requisitos principais

Poderá solicitar a axuda o alumnado que:

• Estea empadroado en Sada durante todo o curso escolar.

• Resida a máis de 3 km do centro de estudos.

• Estea matriculado en centros públicos e en modalidade presencial.

Non poderá acollerse alumnado de infantil, primaria ou ESO, nin matriculado en centros privados ou concertados, nin estudos de duración inferior a 6 meses.

📌 Criterios de baremación

A valoración das solicitudes terá en conta:

• Renda per cápita familiar

• Distancia residencia – centro educativo

• Idade da persoa solicitante

• Situacións sociofamiliares especiais (familias numerosas, monoparentais, con persoas dependentes, vítimas de violencia de xénero, etc.)

Segundo a puntuación acadada, as axudas irán dos 130 aos 240 euros.

📌 Presentación de solicitudes

O prazo para presentar solicitudes será de 15 días naturais a partir do día seguinte á publicación do extracto no BOP.
As solicitudes deberán presentarse preferiblemente por vía electrónica a través da sede municipal:
https://sede.sada.gal

Será necesario achegar solicitude normalizada, DNI, certificado de matrícula, documentación económica e, se procede, acreditación de circunstancias familiares especiais.

📌 Xustificación

As persoas beneficiarias deberán presentar entre o 1 e o 30 de abril de 2026 unha certificación do centro educativo que acredite estar de alta nese período. A falta desta documentación implicará o reintegro total da axuda.