O Concello de Carral vén de publicar o extracto da convocatoria do Concurso de decoración de vivendas e comercios polo Nadal 2025, acordo aprobado pola Xunta de Goberno Local o 25 de novembro de 2025 (BDNS: 871767). O texto completo pode consultarse na Base de Datos Nacional de Subvencións.

Obxecto da convocatoria

O certame busca promover o espírito do Nadal mediante a decoración con iluminación e motivos propios destas datas nas fachadas, balcóns, xardíns e escaparates das vivendas e comercios do municipio.

Persoas participantes

Poderán participar propietarios/as ou arrendatarios/as maiores de idade de vivendas ou comercios situados no termo municipal de Carral —tanto en zona urbana como rural— e nos que as persoas participantes estean empadroadas.

Inscricións: prazo e forma de presentación

O prazo de inscrición abrangue desde o día seguinte á publicación do extracto no BOP ata o 15 de decembro de 2025 incluído.

As solicitudes deberán cubrirse mediante o Anexo I, xunto co DNI da persoa solicitante e, se procede, o da persoa representante, e presentarse:

• A través da sede electrónica do Concello de Carral no trámite “Solicitud de participación en el Concurso decoración de viviendas y comercios por Navidad 2025”.

• Ou presencialmente no Rexistro Municipal.

Ademais, as persoas participantes deberán enviar catro fotografías e/ou un vídeo da decoración ao correo omix@carral.es antes do 18 de decembro de 2025.

Categorías e premios

O concurso conta con tres categorías:

1. Casas: fachadas e xardíns de vivendas unifamiliares.

2. Apartamentos, pisos, áticos e dúplex: fachadas, balcóns e portas de entrada exteriores.

3. Comercios: escaparates e interior do establecemento.

Cada categoría incluirá tres premios:

• 1º premio: cesta de Nadal valorada en 95 €

• 2º premio: cesta de Nadal valorada en 80 €

• 3º premio: cesta de Nadal valorada en 60 €

Criterios de valoración

O xurado valorará especialmente:

• A creatividade, composición e deseño.

• A orixinalidade e elaboración propia.

• O uso da iluminación como elemento principal.

• A utilización de materiais de refugallo.

A puntuación máxima será de 10 puntos por membro do xurado. Os premios poderán declararse desertos se non se acada un nivel mínimo de calidade ou se a participación é insuficiente.