O Concello de Ortigueira vén de aprobar, na sesión da Xunta de Goberno Local do 27 de novembro de 2025, as bases reguladoras de cinco procesos selectivos incluídos na Oferta de Emprego Público 2024:

• Catro prazas de auxiliar de axuda no fogar (Grupo IV).

• Unha praza de peón na especialidade de recollida de lixo (Grupo V).

As cinco prazas cubriranse mediante o sistema de oposición en quenda libre e darán lugar á vinculación como persoal laboral fixo. Ademais, en ambos procesos constituiranse listas de agarda para posibles contratacións temporais, de acordo co Estatuto dos Traballadores.

Catro prazas de auxiliar de axuda no fogar (Grupo IV)

As catro prazas pertencen ao convenio do persoal laboral municipal e están distribuídas entre a oferta ordinaria e a taxa excepcional prevista no artigo 20.4 da LOXE 2023.

As persoas aspirantes deberán contar coa ESO e con titulacións profesionais específicas relacionadas coa atención sociosanitaria, integración social, coidados auxiliares de enfermaría ou equivalentes segundo a normativa vixente.

Unha praza de peón, especialidade recollida de lixo (Grupo V)

Tamén se convoca unha praza de persoal laboral fixo para tarefas de recollida de residuos sólidos urbanos.
Poderán presentarse persoas maiores de 16 anos que cumpran os requisitos xerais de acceso ao emprego público, incluíndo non estar inhabilitado e posuír as condicións físicas e psíquicas necesarias para o posto.

Publicación das bases e prazo de solicitudes

O texto íntegro das bases de ambos procesos publicarase no Boletín Oficial da Provincia da Coruña (BOP) e no taboleiro de anuncios da sede electrónica municipal. Así mesmo, publicarase un anuncio da convocatoria no DOG e no BOE.

O prazo para presentar solicitudes será de 20 días hábiles a partir do día seguinte ao da publicación do anuncio no BOE.