A Deputación de Pontevedra aprobou a convocatoria e as bases de varios procesos selectivos para cubrir 12 prazas vacantes no seu cadro de persoal funcionario, correspondentes ás ofertas de emprego público (OEP) dos anos 2023 e 2025, todas elas pola quenda libre (turno libre).

As prazas convocadas inclúen 10 postos de administrativo/a na rama tributaria (subgrupo C1), dos cales unha praza está reservada para persoas con discapacidade, e 1 posto de oficial/a de comedor (subgrupo C2), incluído na OEP de 2023. Estes procesos teñen como obxectivo reforzar servizos esenciais da administración provincial, con especial atención á xestión tributaria e aos servizos de comedor.

O prazo para presentar solicitudes será de 20 días naturais, contados desde o día seguinte á publicación do extracto da convocatoria no Boletín Oficial do Estado (BOE), tras a difusión íntegra das bases no Boletín Oficial da Provincia de Pontevedra (BOPPO) e do extracto no Diario Oficial de Galicia (DOG).

As persoas interesadas poderán presentar a súa solicitude preferentemente por medios electrónicos a través do formulario normalizado “217424 – Procedementos de selección para o acceso ao emprego público”, dispoñible na Sede electrónica da Deputación de Pontevedra, que admite a identificación mediante certificados de Cl@ve, DNIe ou NIE. Tamén será posible a presentación presencial nos rexistros habilitados pola normativa de procedemento administrativo común.

Entre os requisitos xerais destacan: ter a nacionalidade española ou cumprir co establecido no artigo 57 do TRLEBEP para outras nacionalidades, ser maior de 16 anos, posuír a titulación esixida nas bases específicas antes da fin do prazo, e aboar os dereitos de exame: 15 € para as prazas C1 e 12 € para as de C2. A taxa poderá pagarse en sucursais, banca electrónica ou caixeiros de Abanca, incluído o pago con tarxeta sen necesidade de ser cliente da entidade.

A convocatoria garante medidas de protección e adaptación para persoas con discapacidade, así como a posibilidade de seudonimización dos datos para mulleres vítimas de violencia de xénero que o soliciten, sempre que acrediten a súa situación por medios válidos en dereito.

Os procesos selectivos serán avaliados por tribunais cualificadores paritarios e profesionais, e incluirán probas teóricas e prácticas, tipo test, desenvolvemento de temas e supostos prácticos, ademais dunha proba de galego non eliminatoria da que quedarán exentas as persoas que acrediten o nivel Celga 4 (C1) ou Celga 2/3 (C2), segundo o caso.

Máis información e acceso á documentación oficial na web da Deputación de Pontevedra.