O Concello de Redondela convoca o VI Premio Sesé Mateo de Xornalismo Ético no tratamento da violencia machista, destinado a recoñecer traballos xornalísticos que contribúan a unha comunicación responsable, rigorosa e libre de sensacionalismo sobre a violencia de xénero e vicaria.

Obxecto do premio

O galardón busca recoñecer o labor de profesionais do xornalismo que aborden a violencia machista desde unha perspectiva ética, evitando o sensacionalismo e respectando a intimidade das vítimas e das persoas superviventes máis vulnerables.

Os traballos deberán contribuír á sensibilización social, á prevención da violencia machista e á visibilización das súas causas e consecuencias.

O premio leva o nome de Sesé Mateo, muller feminista e defensora das liberdades, asasinada pola súa exparella en 2017.

Características da convocatoria

• Premio: VI Premio Sesé Mateo de Xornalismo Ético no tratamento da violencia machista.
• Categoría: única.
• Traballos admitidos: noticias, artigos de opinión, reportaxes e calquera outro xénero xornalístico.
• Formato: traballos publicados ou emitidos en medios de comunicación impresos, radiofónicos, audiovisuais ou dixitais.
• Período de publicación ou emisión: do 1 de setembro de 2025 ao 31 de agosto de 2026, ambas datas incluídas.
• Importe: 1.500 euros.

Persoas destinatarias

Poderán participar xornalistas maiores de idade que sexan autoras ou autores dos traballos.

Tamén poderán presentar propostas os xornais, radios ou televisións, aínda que, neste caso, se o traballo resulta premiado, a persoa beneficiaria e perceptora do premio será a súa autora ou autor.

Cada persoa poderá presentar un único traballo.

Os traballos poderán estar redactados en galego ou castelán, outorgándose unha maior puntuación aos realizados en lingua galega.

Criterios de valoración

As candidaturas poderán obter ata 10 puntos, segundo os seguintes criterios:

• Uso da lingua galega: 1 punto.
• Visibilización das formas de violencia de xénero: 1 punto.
• Difusión de recursos de prevención, atención e denuncia: 1 punto.
• Tratamento adecuado da información sobre as vítimas e contextualización con profesionais especializados/as: 1 punto.
• Valoración do xurado sobre o contido: 6 puntos.

As candidaturas que empreguen información, linguaxe ou material sensacionalista ou morboso serán descartadas automaticamente.

O xurado poderá declarar o premio deserto se considera que ningún dos traballos presentados acada o nivel mínimo establecido. Tamén poderá concederse a varios traballos ex aequo, repartíndose o importe do premio a partes iguais.

Presentación de solicitudes

As persoas participantes deberán presentar:

• O traballo que concorre ao premio.
• Fotocopia do DNI da persoa autora.
• Fotocopia do CIF do medio de comunicación que propoña o traballo, de ser o caso.
• Solicitude de participación segundo o Anexo I.
• Datos de contacto da persoa participante ou da entidade propoñente.

As solicitudes poderán presentarse no Rexistro Xeral do Concello de Redondela, na sede electrónica municipal ou a través das demais vías previstas no artigo 16.4 da Lei 39/2015.

Prazo

O prazo de presentación de solicitudes comezará o día seguinte ao da publicación do extracto da convocatoria no Boletín Oficial da Provincia de Pontevedra e finalizará o 30 de setembro de 2026.

Xurado e resolución

O xurado estará composto por:

• Presidencia: a concelleira de Servizos Sociais, Igualdade, Infancia, Persoas Maiores e Xuventude ou persoa designada pola Alcaldía.
• 3 vogais vinculados/as ao Concello de Redondela e aos ámbitos do xornalismo e/ou da cultura.
• Secretaría, con voz e sen voto, a cargo dunha persoa funcionaria do servizo de igualdade do Concello de Redondela.

A resolución do premio publicarase no taboleiro de edictos e na páxina web do Concello de Redondela e notificarase á persoa beneficiaria.

O prazo máximo para resolver será de tres meses desde o día seguinte ao remate do prazo de presentación de solicitudes.

Máis información

As bases da convocatoria publicaranse na páxina web do Concello de Redondela, no taboleiro electrónico e no Boletín Oficial da Provincia de Pontevedra.

https://boppo.depo.gal/web/boppo/detalle/-/boppo/2026/08/31/2026064640