O Concello de Oroso vén de aprobar as bases e a convocatoria dunha bolsa de emprego para a cobertura temporal de postos de auxiliar administrativo/a mediante funcionarios/as interinos/as. A resolución, ditada pola Alcaldía o pasado 19 de setembro (expediente 2025/E001/000006), ten como obxectivo garantir unha resposta áxil ás necesidades de persoal e asegurar un bo servizo á cidadanía.

A bolsa de emprego corresponde ao Grupo C, Subgrupo C2, escala de Administración Xeral, Subescala Auxiliar Administrativo, e cubrirase a través do sistema de oposición libre, de acordo cos principios de igualdade, mérito, capacidade e publicidade.

As funcións a desempeñar inclúen tarefas propias dun auxiliar administrativo, como mecanografía, tramitación de correspondencia, cálculo sinxelo, manexo de arquivos e outras funcións administrativas básicas.

Entre os requisitos mínimos figuran: ter nacionalidade española ou da UE, ter cumpridos 16 anos, posuír a titulación de ESO ou equivalente, non estar incurso en incompatibilidades, así como reunir a capacidade funcional necesaria.

📌 Prazo de solicitude: As persoas interesadas disporán de 10 días naturais, contados desde o seguinte ao da publicación da convocatoria no Boletín Oficial da Provincia da Coruña, para presentar a súa instancia, ben no Rexistro Xeral do Concello (Praza Isaac Díaz Pardo, 1, Sigüeiro) ou a través da Sede Electrónica: https://sede.oroso.gal/sxc/gl/.

As bases completas e a información sobre o proceso están dispoñibles no taboleiro electrónico de anuncios do Concello de Oroso.