O Concello do Rosal publicou as bases reguladoras do proceso selectivo para a cobertura dunha praza de persoal laboral fixo de limpador/a de edificios municipais, correspondente á Oferta de Emprego Público 2024.

A convocatoria realizarase mediante o sistema de oposición, con probas teóricas, prácticas e de coñecemento do galego, e permitirá a creación dunha bolsa de emprego para futuras necesidades.

As persoas aspirantes deberán reunir, entre outros, os seguintes requisitos:

• Ter nacionalidade española ou doutros Estados con dereito ao acceso á función pública.

• Ter cumpridos 16 anos e non exceder da idade de xubilación forzosa.

• Posuír capacidade funcional para o desempeño das tarefas.

• Estar en posesión do certificado de escolaridade ou equivalente.

• Acreditar coñecementos de galego (CELGA 2 ou equivalente).

• Aboar unha taxa de 12,00 € en concepto de dereitos de exame.

O prazo de presentación de solicitudes será de 20 días hábiles a partir da publicación do anuncio da convocatoria no Boletín Oficial do Estado (BOE).

As solicitudes poderán presentarse preferentemente a través da Sede Electrónica do Concello do Rosal (https://orosal.sedelectronica.es), ou de xeito presencial no Rexistro Xeral do Concello, ademais das vías previstas na normativa administrativa.

Toda a información, incluíndo o programa do proceso selectivo, pode consultarse na Sede Electrónica do Concello do Rosal.
BOP Pontevedra