O Concello de Rianxo aprobou, mediante a Resolución da Alcaldía número 1262/2025 do 30 de outubro, a modificación do seu Plan Estratéxico de Subvencións (PES) para o período 2024-2026.

O documento recolle as liñas de axuda municipal destinadas a apoiar proxectos de interese público e social nas diferentes áreas de actuación local, tales como servizos sociais, deportes, educación, cultura, seguridade cidadá e desenvolvemento económico e comercial.

O Plan ten como obxectivo mellorar a eficacia e transparencia na xestión das subvencións municipais, garantindo o cumprimento dos principios de publicidade, concorrencia, igualdade e eficiencia na distribución dos recursos públicos. Ademais, recolle os mecanismos de seguimento e avaliación das axudas, para asegurar a súa adecuación aos obxectivos estratéxicos marcados polo Concello.

Entre as liñas máis destacadas inclúense:

• Apoio a programas sociais que fomentan a autonomía persoal e a inclusión.

• Subvencións a entidades deportivas e educativas do municipio.

• Axudas para a promoción cultural e a recuperación da memoria democrática.

• Apoio á actividade do voluntariado de Protección Civil.

• Programas de dinamización do comercio local e de fomento do emprego.

O documento completo do Plan Estratéxico de Subvencións do Concello de Rianxo 2024-2026, xa modificado, pode consultarse no Taboleiro da Sede Electrónica municipal e no Boletín Oficial da Provincia da Coruña (BOP).

📍 Máis información: https://concelloderianxo.gal