A Consellería de Educación, Ciencia, Universidades e Formación Profesional convocou as probas de acceso aos ciclos formativos de grao medio e grao superior de Formación Profesional para o ano 2026.

Estas probas están dirixidas a persoas que non contan cos requisitos académicos necesarios para acceder directamente a estas ensinanzas e que desexan continuar a súa formación no sistema de FP.

Prazos e inscrición

• O prazo de inscrición estará aberto do 16 ao 26 de marzo de 2026, ambos incluídos.

• As solicitudes poderán presentarse preferiblemente por vía electrónica a través da aplicación Ciclosprobas na sede electrónica da Xunta de Galicia ou presencialmente na secretaría de calquera centro público que imparta FP.

Requisitos

• Para as probas de acceso a grao medio, poderán participar persoas que teñan 17 anos ou os cumpran en 2026 e non dispoñan do título de ESO nin equivalente.

• Para as probas de acceso a grao superior, poderán presentarse persoas que teñan 19 anos ou os cumpran no ano da proba e que non conten co título de bacharelato nin coa titulación de técnico.

Datas das probas

• Grao superior: 29 de abril de 2026.

• Grao medio: 21 de maio de 2026.

Estrutura das probas

• A proba de grao medio inclúe tres partes: sociolingüística, matemática e científico-técnica.

• A proba de grao superior consta dunha parte común (linguas e matemáticas) e dunha parte específica vinculada ás familias profesionais.

Resultados

• As cualificacións provisionais publicaranse a través da aplicación Ciclosprobas e as persoas participantes poderán presentar reclamacións nos prazos establecidos.

• A superación da proba permitirá acceder a ciclos formativos de FP en todo o Estado, segundo as condicións de admisión vixentes.

DOG