O Concello de San Amaro vén de aprobar, mediante resolución da Alcaldía do 26 de novembro de 2025, a nova convocatoria de subvencións destinadas a apoiar a escolarización pública do alumnado de educación infantil e primaria durante o curso 2025-2026.

Estas axudas teñen como obxectivo contribuír ao cofinanciamento de libros de texto, material escolar e outros gastos de carácter social necesarios para o correcto desenvolvemento educativo dos nenos e nenas matriculados no CEIP Lansbricae de San Amaro.

Quen pode solicitalas?

Poderán acollerse a estas subvencións as familias que cumpran os seguintes requisitos:

• Ter fillos/as cursando educación infantil ou primaria no CEIP Lansbricae.

• Estar empadroado/a no Concello de San Amaro no momento da solicitude ou estar matriculado no centro educativo.

• Atoparse ao corrente coa AEAT, ATRIGA e a Seguridade Social.

• Cumprir os requisitos establecidos na Lei 38/2003 de subvencións e na Lei 9/2007 de subvencións de Galicia.

Importes das axudas

• Educación primaria: ata 100 € por alumno/a.

• Educación infantil: ata 150 € por alumno/a.

O crédito total destinado a esta convocatoria é de 6.000 euros, con cargo á aplicación orzamentaria 326.48.

Presentación de solicitudes

As axudas deberán ser solicitadas polos representantes legais do alumnado mediante o modelo normalizado dispoñible:

• Na sede electrónica do Concello: https://sanamaro.sedelectronica.gal

• No Rexistro Xeral do Concello, de luns a venres de 9:00 a 14:00 h.

• Nos lugares previstos no artigo 16.4 da Lei 39/2015.

O prazo de presentación será de cinco días hábiles a partir do día seguinte á publicación da convocatoria no Boletín Oficial da Provincia.

Xunto coa solicitude deberá achegarse a documentación requirida, como DNI do solicitante, Libro de Familia, declaracións responsables, informe de matrícula, facturas e certificado IBAN.