O Concello de Miño vén de aprobar a convocatoria de subvencións municipais para o ano 2025 dirixidas á promoción de actividades e investimentos de interese xeral, tanto no eido cultural como deportivo e social.

Segundo recolle a Resolución da Alcaldía do 17 de setembro de 2025 (BDNS Identif.: 857376), poderán optar a estas axudas entidades públicas ou privadas sen ánimo de lucro, inscritas no Rexistro municipal de asociacións, así como deportistas individuais federados empadroados no municipio.

As subvencións están destinadas a apoiar actividades como programas de dinamización xuvenil, iniciativas educativas, fomento da igualdade, promoción das artes, actividades deportivas ou accións de integración social, así como pequenos investimentos en infraestruturas e equipamentos necesarios para o seu desenvolvemento.

O importe máximo subvencionable será do 80% do orzamento da actividade. Para este 2025 establécense créditos máximos de:

• 5.000 € para actividades culturais

• 5.500 € para actividades deportivas de asociacións

• 1.500 € para deportistas individuais

• 3.500 € para investimentos culturais

• 2.000 € para investimentos deportivos

O prazo para a presentación de solicitudes permanecerá aberto ata o 15 de outubro de 2025, no Rexistro xeral do Concello de Miño, tanto de forma presencial como electrónica.

O texto completo da convocatoria pode consultarse na Base de Datos Nacional de Subvencións: https://www.infosubvenciones.es/bdnstrans/GE/es/convocatoria/857376 

BOP Coruña