A Deputación Provincial de Lugo vén de aprobar, mediante acordo da Xunta de Goberno do 31 de outubro de 2025, corrixido o 7 de novembro de 2025, a convocatoria e as bases específicas para cubrir catro prazas de persoal funcionario de carreira da escala de administración xeral, subescala subalterno, baixo a denominación de porteiro/a.

As prazas, incluídas na Oferta de Emprego Público de 2023, distribúense do seguinte xeito:

• 3 prazas da quenda xeral

• 1 praza reservada a persoas con discapacidade

O sistema selectivo será o de concurso-oposición en acceso libre, seguindo os principios de igualdade, mérito, capacidade e publicidade, e conforme a normativa vixente en materia de función pública e acceso ao emprego público.

Requisitos principais

• Non se esixe titulación académica oficial.

• Acreditación do CELGA 3 ou superación da correspondente proba de galego.

• Para a praza de reserva, será necesario ter recoñecido un grao de discapacidade igual ou superior ao 33 %.

Estrutura do proceso selectivo

A fase de oposición inclúe catro exercicios obrigatorios e eliminatorios:

1. Proba de materias comúns (tema escrito ou test).

2. Tema escrito de materias específicas.

3. Suposto práctico relacionado coas funcións do posto.

4. Proba de coñecemento de galego (para quen non presente acreditación).

A continuación realizarase a fase de concurso, na que se valorarán a experiencia profesional e a formación relacionada co posto.

Publicacións e inicio do prazo de inscrición

A convocatoria publicarase no BOP de Lugo, co envío de extracto ao DOG e ao BOE.
O prazo de presentación de solicitudes iniciarase no día seguinte á publicación no BOE.

Máis información

As bases xerais e específicas poden consultarse no BOP nº 262 (14/11/2025) e na sede electrónica da Deputación de Lugo.