O Concello da Estrada aprobou, mediante Resolución de Alcaldía do 8 de abril de 2026, as bases para cubrir de forma definitiva unha praza de auxiliar administrativo/a de Administración Xeral como persoal funcionario de carreira.

A praza, incluída na Oferta de Emprego Público de 2025, pertence ao grupo C2 e estará adscrita ao Departamento de Tesourería municipal.

O proceso selectivo realizarase polo sistema de oposición libre e constará de tres exercicios obrigatorios e eliminatorios:

• Cuestionario tipo test sobre o temario oficial.
• Resolución de supostos prácticos.
• Proba de ofimática (LibreOffice).

Ademais, as persoas aspirantes que non acrediten o nivel de galego (Celga 3 ou equivalente) deberán superar unha proba específica de lingua galega.

Entre os requisitos de participación destacan:

• Titulación mínima de Educación Secundaria Obrigatoria ou equivalente.
• Nacionalidade española ou doutro estado membro da UE (ou supostos equivalentes).
• Ter cumpridos 16 anos e non superar a idade de xubilación forzosa.

O prazo de presentación de solicitudes será de 20 días hábiles desde a publicación da convocatoria no Boletín Oficial do Estado.

As solicitudes deberán presentarse preferentemente por vía electrónica a través da sede do Concello da Estrada, achegando a documentación requirida e o xustificante do pagamento da taxa (15 euros, con exencións para persoas desempregadas).

Toda a información relativa ao proceso (listas, datas de exames e resultados) publicarase na sede electrónica e na páxina web municipal. 

BOPPO